Plantun de Prouvènço

Pèr coumpara dos planto d'encò nostre

Carex foetida & Fissidens dubius

Queirello(-pudènto)

Carex foetida

Cyperaceae

Àutri noum : Moutouso, Sagneto.

Nom en français : Laîche fétide.

Descripcioun :
La queirello-pudènto trachis en mato flaco o en loungour dins li palun e coumbo à nèu de mountagno. Li fueio, plano, soun larjo de 2,5 à 3 mm. Fai de pichòtis enflourejado, mai o mens redouno de 1 à 2 cm, d'espigueto sarrado e pas despassado pèr li bratèio. Lis escaume soun bruno, lis utriculo à dous estigmato an un bè de 1 à 1,2 mm di dos dènt. La planto èi proutejido sus listo roujo, categourìo LC, es à dire soucit minour .

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 30 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 1 à 2 cm
Flourido : Estiéu

Sòu : Si
Autour basso e auto : 1600 à 3000 m
Aparado : Noun
Juliet à avoust

Liò : Palun de mountagno - Coumbo à nèu
Estànci : Subaupen à Aupen
Couroulougi : Ouroufito-Éuroupenco
Ref. sc. : Carex foetida All., 1785

Mousso-divisado-doutouso

Fissidens dubius

Fissidentaceae

Nom en français : Fissident crête-de-coq.

Descripcioun :
Aquelo mousso dóu gènre Fissidens (peristome divisa, vèire li fotò) trachis sus li roco cauquiero e de cop que i'a au sòu. Es uno mousso pulèu pichoto auto de 1 à 3 cm. Fai partido dóu group qu'a ges de lòngui celulo sus lou bord de la fueio (fotò), pamens se vèi bèn uno bando de 3 à 4 cellulo pu claro. Se recounèis tambèn à sa pouncho de fueio emé un benc e que la costo s'acabo just avans lou bout (fotò). Es couneigudo pèr pas faire trop d'espouroufite, pamens sèmblo pas trop lou cas au nostre.

Usanço :
Se pòu counfoundre emé d'àutri meno dóu meme gènre subretout Fissidens taxifolius qu'a pas lou bout de fueio denta d'un biais irregulié e peréu que la costo vai fin qu'au bout dóu bènc (de vèire au microuscope).